ҚАЗАҚСТАН–ҚЫТАЙ ШЕКАРАСЫНДАҒЫ ТЕМІРЖОЛ ЖҮК ТАСЫМАЛЫ 4 ПАЙЫЗҒА ӨСТІ
Қазақстан мен Қытай арасындағы теміржол арқылы жүк тасымалы тұрақты өсім көрсетіп келеді.
2026 жылдың басынан бері «Алтынкөл – Қорғас» шекаралық теміржол өткелі арқылы 6,75 млн тонна жүк тасымалданған. Бұл өткен жылдың сәйкес кезеңімен салыстырғанда 4 пайызға немесе шамамен 250 мың тоннаға артық.
Ресми мәліметке сәйкес, аталған бағыт арқылы Қазақстаннан Қытайға экспортталған жүк көлемі 3,36 млн тоннаны құрады. Бұл көрсеткіш екі ел арасындағы сауда байланысының нығайып, қазақстандық өнімге деген сұраныстың артып келе жатқанын аңғартады.
Бұған дейін жарияланған деректерге сәйкес, биылғы жылдың алғашқы тоқсанында Қазақстан мен Қытай арасындағы жалпы теміржол жүк тасымалы 9,3 пайызға өсіп, 9,1 млн тоннаға жеткен болатын. Сарапшылар мұны екі мемлекет арасындағы көлік-логистика саласындағы ынтымақтастықтың қарқынды дамуының және халықаралық транзиттік дәліздердің тиімділігінің артуының көрінісі ретінде бағалайды.
Теміржол инфрақұрылымын жаңғырту, шекаралық өткелдердің өткізу қабілетін арттыру және халықаралық көлік бағыттарын дамыту Қазақстан мен Қытай арасындағы жүк айналымының алдағы уақытта да ұлғаюына негіз болады. Бұл өз кезегінде өңірлік сауда-саттықтың кеңеюіне, транзиттік әлеуеттің артуына және екі елдің экономикалық байланыстарының одан әрі нығаюына ықпал етеді.
